इस्लामाबाद । पाकिस्तानको खैबर पख्तुनख्वा प्रान्तमा अविरल वर्षापछि आएको बाढी र पहिरोका कारण गएको ४८ घण्टामा कम्तिमा ३२४ जनाको मृत्यु भएको छ। लगातारको वर्षासँगै आएको आकस्मिक बाढीले बस्ती र सडक डुबानमा परेको र ठूलो संख्यामा मानिसहरू भग्नावशेषमुनि पुरिएको समाचार एजेन्सीहरूले जनाएका छन्।
स्थानीय अधिकारीका अनुसार बाढीपहिरोले प्रभावित क्षेत्रमा उद्धार र राहत कार्य जारी छ। तर, निरन्तरको वर्षा, कमजोर भौगोलिक संरचना र सडक अबरुद्ध हुँदा उद्धारकर्मीहरूले ठूलो कठिनाइ भोगिरहेका छन्। शनिबार मात्र उद्धार टोलीले भग्नावशेष खोतल्दै थुप्रै शव बाहिर निकालेका थिए।
घटनामा कम्तिमा १३७ जना घाइते भएको र अझै कैयौं व्यक्ति हराइरहेको आशंका गरिएको छ। धेरै स्थानमा घरहरू पूर्ण रूपमा भत्किएका छन् भने खेतीयोग्य जमिन, पुल, सडक र विद्युत् अवसंरचना ठूलो क्षति भएको जनाइएको छ।
विपद् व्यवस्थापन विभागले प्रभावित जिल्लाहरूमा आकस्मिक सहायता आपूर्ति गर्ने तयारी भइरहेको जनाएको छ। अस्थायी शिविरहरू स्थापना गरिएको र विस्थापितलाई खाना, पानी तथा औषधि वितरण भइरहेको तर पहुँचका कारण राहत आपूर्ति सहज नभएको जनाएको छ।
खैबर पख्तुनख्वा पाकिस्तानको पहाडी प्रान्त भएकाले वर्षायाममा यहाँ पहिरो र बाढीको जोखिम अत्यधिक रहने गरेको छ। यसपालि भने लगातार र भीषण वर्षाले क्षति असामान्य रूपमा बढाएको हो।
सरकारले उद्धारमा सेना र सुरक्षा निकायलाई समेत परिचालन गरेको छ। विपद् व्यवस्थापन विज्ञहरूले अझै केही दिन वर्षा जारी रहने सम्भावना भएकाले सतर्क रहन आग्रह गरेका छन्।
