काठमाडौं – सञ्चार तथा सूचना प्रविधि मन्त्रालयले आगामी ४५ दिनभित्र नागरिक एपमार्फत राहदानी (पासपोर्ट) र सवारी चालक अनुमति पत्र (लाइसेन्स) लगायतका प्रमुख सरकारी सेवाका लागि एकीकृत आवेदन प्रणाली सञ्चालनमा ल्याउने भएको छ।
मन्त्रालयले स्वीकृत गरेको ‘प्रमुख सुधारात्मक कार्यक्रम’ अन्तर्गत सरकारी सेवाहरूलाई प्रविधिमैत्री, छरितो र झन्झटमुक्त बनाउने उद्देश्यसहित यस्तो योजना अघि सारिएको हो।
मन्त्रालयका अनुसार नागरिक एपमा प्रहरी प्रतिवेदन, राहदानी र सवारी चालक अनुमति पत्र जस्ता सेवाहरूलाई अन्तरआबद्ध गरी एउटै पोर्टलबाट आवेदन दिन सकिने व्यवस्था मिलाइनेछ। यस प्रणाली कार्यान्वयनमा आएपछि सेवाग्राहीहरूले विभिन्न कार्यालय धाउनुपर्ने झन्झट घट्ने विश्वास गरिएको छ।
उल्लेखनीय छ कि नागरिक एपमार्फत अनलाइनबाटै प्रहरी प्रतिवेदन प्राप्त गर्ने सेवा भने यसअघि नै सञ्चालनमा आइसकेको छ। मन्त्रालयले आगामी दिनमा थप सरकारी सेवाहरूलाई पनि क्रमशः एपसँग आबद्ध गर्दै लैजाने योजना बनाएको जनाएको छ।
