🔴 सिन्धुलीमा रहस्यमय घटना: एकै परिवारका १६ जना सदस्य हराए

सिन्धुली, साउन १३ ।

सिन्धुलीको गोलन्जोर गाउँपालिका–६, छेत्पास्थित भण्डास बिप्पर कटेरी भन्ने स्थानमा बस्दै आएका उर्मिला हायुसहित एकै परिवारका १६ जना सदस्य एकाएक बेपत्ता भएका छन्।

गोलन्जोर गाउँपालिकाका अध्यक्ष शंकरराज बरालले दिएको जानकारी अनुसार, यो परिवार लोपोन्मुख हायु जाति अन्तर्गत पर्छ र उनीहरूको घर एकान्त जंगलको बिचमा रहेको थियो। उक्त घरमा उर्मिला हायुले आफ्ना छोराबुहारी, छोरी, नातिनातिना, ज्वाइँ लगायत १६ जना सदस्यको रेखदेख गर्दै आएकी थिइन्।

बरालका अनुसार, शुक्रबार वा शनिबार नै उनीहरू हराएको प्रारम्भिक अनुमान गरिएको छ।

“उनीहरूको घर नजिक कुनै छिमेकी छैन, लगभग जंगलको बिचमा छ। त्यहाँ पुग्न १०–१५ मिनेटको पैदल यात्रा गर्नुपर्छ,” अध्यक्ष बरालले बताए।

घटनास्थलको अवलोकन गर्दा, भान्छा घरको रूपमा प्रयोग गरिएको सानो छाप्रोमा मात्र आगलागी भएको देखिएको छ भने अन्य संरचनाहरू सामान्य अवस्थामा छन्। गाउँका अरूको अधियाँमा राखेर पालेका गाइवस्तु र कुखुराहरू भने बिचल्ली अवस्थामा फेला परेका छन्।

बरालका अनुसार, “खानपिनको व्यवस्था गरिने ठाउँमा मात्र आगलागी देखिन्छ, अन्यत्र केही असामान्य अवस्था छैन।”

सरकारबाट लोपोन्मुख जातिको रूपमा विभिन्न सुविधा पाउँदै आएको यो परिवारको रहस्यमय रूपमा सम्पूर्ण सदस्य बेपत्ता हुनुले गाउँमा त्रास फैलिएको छ। हाल घटनाको अनुसन्धान र खोजीका लागि प्रहरी परिचालन गरिएको छ।

👉 घटनाको विस्तृत विवरण आउन बाँकी छ।