📢 रसुवामा फेरि बाढीको प्रकोप, सडक अवरुद्ध, टहरा र पुल बगायो

साउन १३ — केही हप्ता अघि मात्र बाढीले ठुलो क्षति पुर्‍याएको रसुवामा पुनः बाढीको प्रकोप देखिएको छ। चीनतर्फबाट बग्ने ल्हेन्दे र केरुङ खोलामा आएको बाढीका कारण गोसाइँकुण्ड गाउँपालिका–५ मा रहेका पाँच वटा टहरा बगाएका छन्।

बाढीले रसुवागढी भन्सार यार्डको संरचना र धर्ककाँटा समेत बगाएको छ। ल्हेन्दे र केरुङ खोलाको मिसावटपछि बनेको भोटेकोशी नदीले कटान गर्दा तातोपानी डाँडाको भागमा सडक भासिएको छ। त्यसले गर्दा पासाङ ल्हामु राजमार्ग पूर्ण अवरुद्ध भएको छ।

यसै बाढीमा रसुवागढी जलविद्युत आयोजनाको क्याम्पमा राखिएका दुईवटा पिकअप गाडी समेत बगेका छन्। ती गाडीहरू फोर्स रेन्जर ब्रान्डका हुन्। साथै, जलविद्युततर्फ जान प्रयोग हुने फलामे पुलसमेत बाढीले बगाएको जानकारी प्राप्त भएको छ।

यस्तै, गोसाइँकुण्ड–२ मा करिब १५ मिटर सडक कटान हुँदा मोटरसाइकल बाहेक अन्य सवारी साधन सञ्चालनमा आउन नसक्ने अवस्था देखिएको छ। सो क्षेत्रमा रहेको एक बिजुली पोल पनि ढलेको छ।

त्यस्तै, फेन्लुङ क्षेत्रको ५ मिटर सडक पनि कटान हुँदा त्यहाँ अहिले साना गाडी मात्र सञ्चालन गर्न मिल्ने अवस्था छ।

स्थानीय प्रशासन, प्रहरी तथा सुरक्षाकर्मीहरू क्षति मूल्याङ्कन र उद्धार कार्यमा खटिएका छन्। जोखिम अझै नटरेकोले सावधानी अपनाउन र आवश्यक नपरी बाहिर ननिस्कन स्थानीय बासिन्दालाई आग्रह गरिएको छ।