पोखरा — गण्डकी प्रदेश सरकारले विभिन्न जिल्लामा रहेका पर्यटन, कृषि, सामाजिक विकास, स्वास्थ्य र पूर्वाधारसम्बन्धी १७ वटा कार्यालयहरूलाई गाभेर संयुक्त कार्यालय बनाउने निर्णय गरेको छ। यस निर्णयसँगै एउटै कार्यालयबाट दुई वा बढी जिल्लाको सेवा उपलब्ध हुने भएको छ।
प्रदेश सरकारका अनुसार, पर्यटन तथा उद्योग कार्यालयहरू म्याग्दी–मुस्ताङ, बागलुङ–पर्वत, स्याङ्जा–कास्की, तनहुँ–गोरखा, र लमजुङ–मनाङ एकीकरण गरेर संयुक्त कार्यालय बनाइनेछ।
त्यसैगरी, कृषि तथा पशु सेवा क्षेत्रमा मनाङ र मुस्ताङका कृषि ज्ञान केन्द्र र भेटेनरी अस्पतालहरूलाई एकीकृत कार्यालयमा परिणत गरिनेछ। बाली संरक्षण, माटो तथा मल परीक्षण र बिउबिजन गुणस्तर नियन्त्रण केन्द्रलाई पनि एकीकृत प्रयोगशालामा रुपान्तरण गरिने भएको छ।
सामाजिक विकास कार्यालयहरू पनि दुई–दुई जिल्लामा गाभिनेछन्—म्याग्दी–मुस्ताङ, बागलुङ–पर्वत, स्याङ्जा–कास्की, तनहुँ–गोरखा, र लमजुङ–मनाङमा संयुक्त कार्यालय रहनेछन्।
यस्तै, पर्वत र कास्कीका व्यवसायिक तथा सीप विकास तालिम केन्द्रलाई गण्डकी प्राविधिक शिक्षा तथा व्यवसायिक प्रतिष्ठान पोखरामा गाभ्ने, र बागवानी विकास स्रोत केन्द्रलाई कृषि व्यवसाय प्रवर्द्धन सहयोग तथा तालिम केन्द्र पोखरामा मिलाउने निर्णय भएको छ।
स्वास्थ्य क्षेत्रमा प्रादेशिक क्षयरोग नियन्त्रण केन्द्र पोखरालाई प्रादेशिक जनस्वास्थ्य प्रयोगशालासँग मिलाएर प्रादेशिक जनस्वास्थ्य तथा क्षयरोग नियन्त्रण केन्द्र बनाइनेछ।
पूर्वाधारतर्फ, भूमिगत जलस्रोत तथा सिंचाइ कार्यालय नवलपरासी पूर्वलाई जलस्रोत तथा सिंचाइ विकास डिभिजन कार्यालयमा गाभ्ने योजना छ।
प्रदेश सरकारका अनुसार, यो एकीकरणले प्रशासनिक खर्च कटौती, सेवा प्रवाहमा सहजता र दक्ष जनशक्ति प्रयोगमा सुधार ल्याउने अपेक्षा गरिएको छ।
