यस वर्षको मनसुन नेपालभरबाट पूर्ण रूपमा बाहिरियो

जल तथा मौसम विज्ञान विभागको मौसम पूर्वानुमान महाशाखाका अनुसार शुक्रबारदेखि देशभरबाट मनसुनको समाप्ति भएको हो। विभागले जनाएको छ कि २० असोजका दिन सुदूरपश्चिम, कर्णाली, लुम्बिनी प्रदेशको पश्चिमी क्षेत्रका अधिकांश स्थानहरू र गण्डकी प्रदेशको पश्चिमी भागका केही स्थानहरूबाट मनसुन बाहिरिन सुरु भएको थियो।

नेपालमा मनसुन बाहिरिने सरदर मिति अक्टोबर २ (१६ असोज) भए पनि यस वर्ष मनसुन आठ दिन ढिलो गरी बाहिरिएको विभागले जानकारी दिएको छ।

यद्यपि मनसुन समाप्त भए पनि स्थानीय वायु र पश्चिमी वायुको प्रभावका कारण कतिपय स्थानमा आंशिक बदली र हल्का वर्षा हुने सम्भावना रहन सक्ने विभागले उल्लेख गरेको छ।