काठमाडौं । सोमबार नेपाली बजारमा सुन र चाँदी दुवैको मूल्य हालसम्मकै उच्च विन्दुमा पुगेको छ। नेपाल सुनचाँदी व्यवसायी महासंघका अनुसार आज सुनको भाउ प्रतितोला २ लाख ६१ हजार ७ सय रुपैयाँ तोकिएको छ।
अघिल्लो दिनको तुलनामा सुनको मूल्य ३ हजार ४ सय रुपैयाँले वृद्धि भएको हो। यसअघि गत सोमबार प्रतितोला २ लाख ६० हजार ७ सय रुपैयाँ पुगेर बनाएको रेकर्डलाई ठीक एक सातामै तोड्दै सुनले नयाँ उचाइ कायम गरेको महासंघले जनाएको छ।
त्यसैगरी चाँदीको मूल्य पनि निरन्तर नयाँ रेकर्ड बनाउँदै गएको छ। आज चाँदीको भाउ प्रतितोला ४ हजार २३५ रुपैयाँ कायम भएको छ, जुन अघिल्लो दिनको तुलनामा १३० रुपैयाँले बढी हो। यसअघि चाँदी प्रतितोला ४ हजार १०५ रुपैयाँमा कारोबार भएको थियो।
अन्तर्राष्ट्रिय बजारमा सुनचाँदीको मूल्यवृद्धि, विश्व आर्थिक अनिश्चितता तथा लगानीकर्ताको आकर्षण बढ्नुलाई स्थानीय बजारमा मूल्य बढ्नुको प्रमुख कारण मानिएको छ।
