गलकोट । गोलकोत संस्कृति संरक्षण तथा समाज विकास मञ्चको आयोजनामा ३२ औँ वार्षिकोत्सव तथा चैते दशैँ मेला २०८२ सम्पन्न भएको छ ।
“खेलकुद, कला र संस्कृति हाम्रो सान, पर्यटकीय स्थल कोतमैदान गलकोटको पहिचान” भन्ने मूल नाराका साथ आयोजना गरिएको मेला विविध कार्यक्रमसहित सम्पन्न भएको हो ।
कार्यक्रममा बोल्दै गलकोट नगरपालिकाका नगर प्रमुख भरत शर्मा गैरे ले गलकोटको समग्र विकासका लागि संस्कृति, खेलकुद र सामाजिक एकता मजबुत हुनु आवश्यक रहेको बताउनुभयो । उहाँले यस्ता मेलामहोत्सवले स्थानीय पहिचान जोगाउनुका साथै पर्यटन प्रवर्द्धनमा समेत टेवा पुग्ने धारणा व्यक्त गर्नुभयो । साथै, आगामी दिनमा यस्ता गतिविधिलाई अझ व्यवस्थित र प्रभावकारी बनाउँदै लैजान नगरपालिका प्रतिबद्ध रहेको बताउनु भएको थियो ।
सो अवसरमा वडा नं. १ का वडा अध्यक्ष लालबहादुर राना तथा मञ्चका संस्थापक अध्यक्ष देवेन्द्र बहादुर खत्रीले शुभकामना मन्तव्य राख्नुभएको थियो ।
वार्षिकोत्सवको अवसरमा आयोजित खुल्ला वडा स्तरीय लोकगीत तथा लोकनृत्य प्रतियोगितामा बरेङ गाउँपालिका वडा नं. ५ सुखौरा भित्रिबन समूह प्रथम, ताराखोला मगर समाज द्वितीय र कोतमैदान आमा समूह तृतीय भएका छन् ।
प्रतियोगितामा प्रथम हुने समूहले नगद रु ३० हजारसहित ट्रफी, मेडल र प्रमाणपत्र, द्वितीय हुनेले रु २० हजार र तृतीय हुनेले रु १० हजारसहित पुरस्कार प्राप्त गरेका छन् ।
मेलामा चर्चित कलाकार दिप्लव खातीको सांगीतिक प्रस्तुति तथा विभिन्न सांस्कृतिक कार्यक्रमहरू समेत प्रस्तुत गरिएको थियो । साथै, मेला सफल बनाउन सहयोग गर्ने सहयोगदातालाई सम्मान गरिएको थियो ।
कार्यक्रम मञ्चका अध्यक्ष हर्क पन्तको अध्यक्षता, वरिष्ठ उपाध्यक्ष गगन कुँवरको स्वागत मन्तव्य र सचिव गुञ्ज बहादुर खत्रीको सञ्चालनमा सम्पन्न भएको थियो ।
साथै गलकोटको ऐतिहासिक शक्ति पीठ कोतघरस्थित खड्का मन्दिर तथा भगवती मन्दिरमा जम्मा आम्दानी रु १ लाख ७२ हजार ३० (१७२०३०) संकलन भएको छ।
उक्त रकममध्ये विभिन्न कार्यमा रु १ लाख ५३ हजार ८ सय ८० (१५३८८०) खर्च गरिएको छ।
खर्चपछि रु १८ हजार १ सय ५५ (१८१५५) रकम बचत रहेको जानकारी कोषाध्यक्ष दल बहादुर खड्का ले दिनुभएको छ।
