चार प्रदेशमा वर्षा र हिमपातको सम्भावना

देशमा पश्चिमी वायुको आंशिक प्रभाव कायम रहेकाले आज नेपालका विभिन्न पहाडी र हिमाली भू–भागमा वर्षासहित हिमपात हुने सम्भावना रहेको मौसम पूर्वानुमान महाशाखाले जनाएको छ।

महाशाखाका अनुसार दिउँसो लुम्बिनी, कर्णाली, सुदूरपश्चिम र गण्डकी प्रदेशका पहाडी भू–भागमा सामान्यदेखि मध्यम वर्षासहित हिमपात हुन सक्छ। लुम्बिनी र सुदूरपश्चिम प्रदेशको तराई भू–भागका एकदुई स्थानमा पनि हल्का वर्षा पर्न सक्ने सम्भावना छ।

राति भने गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्र सामान्यतया बदली रहने र हिमाली भू–भागका केही स्थानमा मध्यम वर्षासहित हिमपातको पूर्वानुमान गरिएको छ।

कोशी प्रदेशसहित देशका अन्य भागमा भने आंशिक बदलीबाट मौसम क्रमशः सफा हुने महाशाखाको भनाइ छ।