ताराखोला गाउँपालिकामा प्रतिनिधि सभा निर्वाचन लक्षित घरदैलो अभियान राष्ट्रिय स्वतन्त्र पार्टी (रास्वपा) ले सुरु गरेको छ। आगामी फागुन २१ गते हुने प्रतिनिधि सभा निर्वाचनमा बागलुङ जिल्ला क्षेत्र नम्बर २ का प्रत्यक्ष उम्मेदवार सोम शर्मा सहित पार्टीका पदाधिकारी तथा कार्यकर्ताहरूको सहभागितामा अभियान सञ्चालन भएको हो।
घरदैलोका क्रममा स्थानीय मतदातासँग प्रत्यक्ष भेटघाट गर्दै सोम शर्माले रास्वपाको नीति, उद्देश्य र वैकल्पिक राजनीतिको अवधारणाबारे जानकारी दिनुभयो। उहाँले भन्नुभयो,
“देशलाई नयाँ सोच र इमानदार नेतृत्वको आवश्यकता छ। पुराना दलको कार्यशैलीले जनताको विश्वास गुमाइसकेको छ। हामीले इमानदार राजनीति, भ्रष्टाचारविरुद्धको कडा लडाइँ र जनताको समस्या संसदसम्म पु¥याउने प्रतिबद्धता लिएर अघि बढेका छौं।”
साथै शर्माले स्थानीयवासीले उठाएका विकास, रोजगारी, शिक्षा र स्वास्थ्यसम्बन्धी समस्यालाई प्राथमिकतामा राखेर समाधानका लागि पहल गर्ने प्रतिबद्धता व्यक्त गर्नुभयो।
रास्वपा आगामी दिनहरूमा ताराखोला गाउँपालिकाका अन्य वडाहरू तथा बागलुङ क्षेत्र नम्बर २ का विभिन्न स्थानमा घरदैलो अभियानलाई निरन्तरता दिने बताएको छ।
