काठमाडौं । महान्यायाधिवक्ता कार्यालयले पूर्व गृहमन्त्री रवि लामिछानेविरुद्ध विभिन्न जिल्ला अदालतमा दायर गरिएका संगठित अपराध र सम्पत्ति शुद्धिकरणसम्बन्धी अभियोग फिर्ता लिन सम्बन्धित सरकारी वकिल कार्यालयलाई स्वीकृति दिएको छ।
यो निर्णयसँगै कास्की, रुपन्देही, काठमाडौं र पर्सा जिल्ला अदालतमा चलिरहेका संगठित अपराध तथा सम्पत्ति शुद्धिकरणका मुद्दा फिर्ता हुनेछन्। विशेष गरी जिल्ला अदालत कास्कीमा चलिरहेको सम्पत्ति शुद्धिकरण र संगठित अपराधको मुद्दा यस निर्णयपछि फिर्ता हुनेछ।
महान्यायाधिवक्ता सबिता भण्डारी बरालले सहकारी ठगीसम्बन्धी मुद्दा भने यथावत् रहने स्पष्ट पार्नुभएको छ। उहाँका अनुसार संगठित अपराध र सम्पत्ति शुद्धिकरणका अभियोग फिर्ता लिने गरी मात्र अभियोगपत्र संशोधन गर्न स्वीकृति दिइएको हो, यसलाई सम्पूर्ण मुद्दा फिर्ता लिएको रूपमा बुझ्न नहुने बताउनुभयो।
यसैगरी रुपन्देही, काठमाडौं र पर्सामा चलिरहेका संगठित अपराधका मुद्दा पनि फिर्ता हुनेछन्। तर चितवन जिल्ला अदालतमा यी दुई अभियोग नचलेकाले त्यहाँ अभियोगपत्र संशोधनको निर्णय गरिएको छैन।
