गलकोट, बागलुङ ।
आगामी फागुन २१ गते हुने प्रतिनिधि सभा सदस्य निर्वाचनका लागि नेपाली कांग्रेस बागलुङ क्षेत्र नम्बर २ ले आफ्नो औपचारिक प्रचारप्रसार तथा घरदैलो अभियान सुरु गरेको छ। अभियानको शुभारम्भ गलकोट नगरपालिका वडा नम्बर १ बाट गरिएको पार्टीले जनाएको छ।
समृद्ध बागलुङको आवाज सिंहदरबार पुर्याउने उम्मेदवार पौडेलको प्रतिबद्धता
घरदैलोका क्रममा मतदाताहरूसँग प्रत्यक्ष भेटघाट गर्दै बागलुङ क्षेत्र नम्बर २ का उम्मेदवार टेकराज पौडेलले देशको विकास र लोकतन्त्रको स्थायी रक्षाका लागि कांग्रेसको विकल्प नभएको बताउनुभयो। उहाँले नेपालको संविधानलाई सही बाटोमा ल्याउन र समृद्ध नेपाल निर्माणका लागि रुख चिन्हमा मतदान गरी आफूलाई विजयी गराउन आग्रह गर्नुभयो।
उम्मेदवार पौडेलले भन्नुभयो— “यस क्षेत्रको भौगोलिक र सामाजिक विकासका लागि यहाँका समस्याहरूलाई म सिंहदरबारको नीति निर्माण तहसम्म पुर्याउनेछु। समृद्ध बागलुङ निर्माणका लागि म सधैँ कटिबद्ध रहनेछु।”
नेतृत्वको उपस्थिति र समर्थन
अभियानमा सहभागी गण्डकी प्रदेश सांसद एवं नेपाली कांग्रेस बागलुङका सभापति जित शेरचन र समानुपातिक उम्मेदवार रेणुका काउचाले पनि वर्तमान राजनीतिक परिस्थितिमा कांग्रेसले नेतृत्व गर्नुपर्ने आवश्यकता औँल्याउँदै पार्टीको एजेण्डाका बारेमा मतदाताहरूलाई जानकारी गराउनुभएको थियो।
अभियानको कार्यतालिका
नेपाली कांग्रेस जिल्ला सह-सचिव फम बहादुर खत्रीका अनुसार वडा नम्बर १ बाट सुरु भएको यो प्रचारप्रसार अभियान भोलि गलकोट नगरपालिकाको वडा नम्बर ३ र ४ मा सञ्चालन गरिनेछ।
वडा नं. १ का सभापति हेम बहादुर खड्काको अध्यक्षतामा भएको सो कार्यक्रमको सञ्चालन प्रदेश ‘क’ का सभापति तिलक घर्तीले गर्नुभएको थियो। फागुन २१ को निर्वाचन नजिकिँदै जाँदा गलकोट क्षेत्रमा चुनावी सरगर्मी ह्वात्तै बढेको छ।
