नेकपा र राष्ट्रिय जनमोर्चाको साझा वाम उम्मेदवार ज्ञामनाथ गैरे ‘अनिल’ लाई विजयी गराउने उद्देश्यसहित गलकोट नगरपालिका वडा नं. १ दुदिलाभाटीमा संयुक्त निर्वाचन सम्पर्क कार्यालय स्थापना गरिएको छ।
सम्पर्क कार्यालय स्थापना कार्यक्रममा बोल्दै नेपाली कम्युनिष्ट पार्टी (नेकपा) गण्डकी प्रदेश सदस्य गुमान सिंह बुढाथोकी र राष्ट्रिय जनमोर्चा जिल्ला सदस्य लालबहादुर रानाले मुलुकले प्राप्त गरेको राजनीतिक उपलब्धिको रक्षा गर्न वामपन्थी शक्तिहरूको विजय अपरिहार्य रहेको बताएका छन्। उनीहरूले संविधान, गणतन्त्र र संघीयताको संरक्षणका लागि वाम शक्तिहरू एकजुट भएर अघि बढ्नुपर्नेमा जोड दिए।
वक्ताहरूले वाम मोर्चाका संयुक्त उम्मेदवार ज्ञामनाथ गैरे ‘अनिल’ लाई वडा नं. १ सहित बागलुङ क्षेत्र नं. २ बाट अत्यधिक मतसहित विजयी गराउन सम्पूर्ण कार्यकर्ता तथा शुभेच्छुकलाई एकजुट भएर लाग्न आह्वान गरे।
कार्यक्रमकै अवसरमा निर्वाचनलाई व्यवस्थित र प्रभावकारी रूपमा सञ्चालन गर्न रनबहादुर विश्वकर्माको संयोजकत्वमा र जीवन भण्डारीको सह–संयोजकत्वमा १०१ सदस्यीय निर्वाचन परिचालन समिति गठन गरिएको छ।
नेकपाले संविधान, गणतन्त्र र संघीयताको रक्षाका लागि यसपटकको निर्वाचन जित्नुको विकल्प नरहेको स्पष्ट पारेको छ। पार्टीले विगतमा गरेको आन्दोलन र संघर्षकै कारण महिला, दलित, अल्पसंख्यक, मुस्लिम र जनजातिलगायत राज्यबाट पछाडि पारिएका समुदायले विशेष अधिकार प्राप्त गरेको भन्दै ती उपलब्धिहरूलाई आम नागरिकसम्म पुर्याउनु आवश्यक रहेको निष्कर्ष निकालिएको बताइएको छ।
